用戶體驗 - 開心些牙。終於買咗婚戒啦！
今日12點碌咗去婚展，極速買餅咭之後就去搵冇乜心水嘅婚戒。 其實都有上網睇吓啲款，但始終要試上手先知同佢襯唔襯 行吓行吓見到一間曾經想預約睇，但因為懶講極都未約嘅店有攤位，就衝過去望望。 最平嘅對戒$5800一對，價錢唔錯，只可惜本人手指太圓潤，戴唔到幼嘅戒指 再左望望右望望，發現有啲粗啲啲嘅款，而且仲好有意思！
TwinsCupid系列：用分別鑲崁來自同一原石的兩顆八心八箭雙子鑽石，鑲喺女仔戒指外圈同男仔戒指內圈。 第一對：女仔係公主款，側邊睇似小皇冠 第二對：平凡中帶點不平凡嘅款式，中間凹入嘅圈仔細睇會發現佢唔係平滑嘅，而係有小小起角，低調嘅detail位 第三對：好明顯我隔離嗰位好鍾意佢嗰隻，選擇障礙症患者嘅我就再睇吓有邊隻都可以襯到佢嗰隻 講到依度要提一提，依間店嘅好處係可以喺同一系列裡裡自由組合對戒架！（選擇障礙就麻煩啲啦） 喺我仲心大心細嘅時候，sales姐姐好熱心話我聽今日有優惠，可以免費送一粒誕生石，鑲埋喺一對戒指嘅內圏，如果唔喜歡出生月嗰粒都可以揀其他月份嘅誕生石），仲有免費刻字服務！ 仲未講完㗎，今日買仲送一個永生花玫瑰盒仔，同珍珠耳環。我買個系列仲有個靚靚盒裝住戒指，真係戒指枕都慳返 永生花首飾盒
我買個系列嘅戒指送依一款戒指盒，又可以刻名。另一個系列個盒仔係木色盒添呀！ 喺個攤位玩咗好耐，差不多試晒人地啲戒指咁滯，難得店員冇睥我仲同我有講有笑，俾錢都俾得開心啲 期待60日後湊對戒指返去！
為免我覆唔切大家，以下店名：
Tiara 日本婚戒訂製
佢地喺婚展並唔係同其他戒指店一齊架～
