用戶體驗 - KO結婚戒指 2

(https://wow.esdlife.com/space.php?uid=92391&do=blog&id=386238)

話說之前去過樓上鋪睇過，但最後都係未揀到。因為如果要轉鉑金，加完後嘅錢又有啲超預算，有啲覺得唔係幾值；雖然話係貴一次戴一世。但搞婚禮已經要好多開支；希望盡可能減下啲開支。加上女仔性格都係鍾意格下價，比較下咁，所以都諗住睇多間。

我本身有follow開間店舖，原來7月都有做婚展；仲可以優惠價$4980購買一對婚戒。我即刻心心眼，Whatsapps間公司問資料同預約時間。我都有問到如果預約左婚展即場睇唔啱，之後再上門市睇係咪會無左個優惠價。對方都好好回覆我話可以做番比我 婚展前一日都有Whatspps提醒我。

13號入婚展，一入門口就一大堆人係咁派單張又叫你聽佢地講嘢。我地先無理到其他參展商，揾左佢地個檔位。唔知係咪算細公司，無大行個啲參展商咁咁多人企係度派嘢sale嘢;感覺舒服好多。

個位哥哥先拎左啲指定款色比我地睇，佢話擺出黎個啲都係銀製sample，可以隨便戴同試。之後佢都有拎啲實物比我地戴同feel下個重量。因為擺展嘅關係，佢地未必款款都有實物睇到(黎個都可以理解)。佢啲女裝戒指款式仲可以配襯埋求婚鑽戒，一套三隻咁;價錢會再優惠啲。

黎個係官網圖片

上一篇都有提過，我未婚夫對手比較粗同大隻。我初初都驚佢會睇唔啱啲款，因為日本戒子款始終都係偏幼同流線型；適合女仔多啲。意外地，佢竟然都覺得唔錯；仲話有啲款式係比樓上鋪靚。

試左幾對上手睇都唔錯，但唔記得影低。但我始終覺得太幼唔襯手大嘅男仕；點知個位哥哥話戒指款式如果太幼其實係可以加粗，最多可以加粗2度。

我未婚夫似乎都好滿意，係欠我想揀嘅款式。女仔始終係多心，佢幫我篩選左我戴得一般嘅款式。問個哥哥轉做鉑金要幾錢，佢話一對$5800。

最後我地揀左一對有少少V嘅款式，但個頂係平囗嘅。(原來我未婚夫就係鍾意佢頂係平口)加錢轉做鉑金；另外加錢轉粗身。

最後埋單$7300，我同未婚夫都覺得價錢合理(仲比原本預算平)，二來又係made in Japan，有質素保証。

個哥哥仲話可以免費刻名同送粒生日月份寶石鑲係戒指入面，話其實都唔一定要係自己生日月份個粒;鍾意個隻色都無問題。我地都覺得幾得意就鑲對方月份。

而家等二個月左右就有貨，到時再去門市final fit，睇下要唔要再改size。

*呀…講起Size，黎間公司特別之處係Size有半碼揀。我見出邊好多都係整數咁跳，佢有半碼又的確幾貼心